Соборное молитвенное правило находящимся в скорби по случаю военных действий

(составлено епископом Волгодонским и Сальским Антонием для духовенства и мирян Волгодонской епархии)

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Я́ко Твое́ есть Ца́рство, и Си́ла и Сла́ва, Отца́ и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Спаси́, Го́споди, лю́ди Твоя́, и благослови́ достоя́ние Твое́, побе́ды правосла́вным христиа́ном на сопроти́вныя да́руя, и Твое́ сохраня́я Кресто́м Твои́м жи́тельство.

Богоро́дице Де́во, ра́дуйся, Благода́тная Мари́е, Госпо́дь с Тобо́ю; благослове́нна Ты в жена́х и благослове́н плод чре́ва Твоего́, я́ко Спа́са родила́ еси́ душ на́ших.

Молитва 1-ая Господу:

Го́споди Бо́же наш, послу́шавый Моисе́я, просте́рша к Тебе́ ру́це, и лю́ди Изра́илевы укрепи́вый на Амали́ка, ополчи́вый Иису́са Нави́на на брань и повеле́вый со́лнцу ста́ти, Ты и ны́не, Влады́ко Го́споди, услы́ши нас, моля́щихся Тебе́. Укрепи́ си́лою Твое́ю страну́ на́шу и во́инство ея́, бра́ни умири́ и мир утверди́. Посли́, Го́споди, неви́димо десни́цу Твою́, рабы́ Твоя́ заступа́ющую во все́х; а и́мже суди́л еси́ положи́ти на бра́ни ду́ши своя́ за ве́ру и Оте́чество, прости́ согрешения их и в день пра́веднаго воздая́ния Твоего́ возда́й венцы́ нетле́ния, я́ко Твоя́ держа́ва, Ца́рство и си́ла, от Тебе́ по́мощь вси прие́млем, на Тя упова́ем, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Молитва 2-ая Богородице:

О, Пресвята́я Де́во, Ма́ти Го́спода Вы́шняго, Всеми́лостивая Засту́пнице и Покрови́тельнице всех, к Тебе́ с ве́рою прибега́ющих! При́зри с высоты́ небе́сныя сла́вы Своея́ на мя, припа́дающаго к подно́жию Твоему́, услы́ши смире́нную моли́тву мене́, гре́шнаго и недосто́йнаго раба́ Твоего́, и принеси́ ю пред возлю́бленнаго Сы́на Своего́. О, Преблагослове́нная Богоро́дице! Ты, имену́емая всех Скоропослу́шница и скорбя́щих Ра́досте, услы́ши и мене́ ско́рбнаго; Ты – Утоле́ние печа́ли, утоли́ и моя́ душе́вныя боле́зни и печа́ли; Ты – Купино́ Неопали́мая, сохрани́ мир и всех нас от вредоно́сных о́гненных стрел вра́жиих; Ты – Взыска́ние поги́бших, не попусти́ мене́ поги́бнути в бе́здне грехо́в мои́х; Ты Цели́тельница стра́ждущих, исцели́ и мене́, уя́звленнаго от не́мощей душе́вных и теле́сных; Ты – Неча́янная Ра́досте, ра́достию спасе́ния Твоего отъе́мли от мене́ страх гряду́щаго муче́ния; Ты – спору́чница гре́шных, бу́ди и мне, гре́шнику, Благосе́рдою Спору́чницею покая́ния и спасе́ния моего́. На Тебе́ по Бо́зе все мое́ упова́ние возлага́ю, бу́ди ми вы́ну Неусы́пная Хода́таица и Всеси́льная Предста́тельница пред Сы́ном Твои́м, Го́сподом на́шим Иису́сом Христо́м, укрепи́ во мне ве́ру в Него́, утверди́ в любви́ Его́, научи́ мене́ люби́ти и сла́вити и Тебе́, Пресвяту́ю Ма́терь Бо́жию, Преблагослове́нную Мари́ю: вседержа́вному покро́ву Твоему́, Богоро́дице, вруча́ю себе́ на вся ве́ки. Ами́нь.

Молитва 3-я св. арх. Михаилу:

Святы́й и вели́кий Арха́нгеле Бо́жий Михаи́ле, Неисповеди́мыя и Пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго Денни́цы на не́бе и посрамля́яй всегда́ зло́бу и кова́рства его́ на земле́! К тебе́ прибега́ем с ве́рою и тебе́ мо́лимся с любо́вию: бу́ди щит несокруши́мый и забра́ло тве́рдое Свято́й Це́ркви и Правосла́вному Оте́честву и во́инству на́шему, огражда́я их молниено́сным мече́м твои́м от всех враг ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ у́бо ум наш Све́том Лица́ Бо́жия, И́же всегда́ сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и зна́ти вся, что подоба́ет нам твори́ти и что презира́ти и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да, утверди́вшеся в зако́не Госпо́днем, преста́нем твори́ти похоте́ния пло́ти, увлека́ясь скороги́бнущими красота́ми ми́ра сего́, я́ко ра́ди тле́ннаго и земна́го безу́мно забыва́ть ве́чное и небе́сное. Над все́ми же си́ми испроси́ нам свы́ше дух и́стиннаго покая́ния, нелицем́ерную печа́ль по Бо́зе и сокруше́ние о греха́х на́ших, да оста́вшееся нам число́ дней вре́меннаго жития́ на́шего поживе́м не во угожде́нии чу́вств и ра́бстве страсте́й на́ших, но во истребле́нии зол, соде́янных на́ми, слеза́ми ве́ры и сокруше́ния серде́чнаго, по́двигами чистоты́ и святы́ми дела́ми милосе́рдия. Когда́ же прибли́зится час сконча́ния на́шего, не оста́ви нас, Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраня́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же не́сть печа́ль, ни воздыха́ние, но жизнь безконе́чная, и, сподо́бльшеся узре́ти Пресве́тлое Лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти А́нгелы Твоя́ в служе́ние спасе́нию на́шему! Ами́нь.

Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.

Го́споди поми́луй. (12 раз)

Моли́твами Пресвято́й Влады́чицы на́шей Богоро́дицы и Присноде́вы Мари́и, си́лою Честно́го Животворя́щего Креста́, архистрати́га Бо́жия Михаи́ла, свята́го великому́ченика Гео́ргия Победо́носца, преподо́бнаго Се́ргия игу́мена Ра́донежского, благове́рнаго кня́зя Алекса́ндра Не́вскаго и всех святы́х, Го́споди, Иису́се Христе́, поми́луй нас. Ами́нь.

---

Если кто чувствует особую душевную скорбь, можно дополнительно читать обычный «Молебный канон ко Пресвятой Богородице, читаемый во всякой скорби душевной и обстоянии» (есть в каждом молитвослове отдельно или в составе 3-х канонов). После прочтения канона читаем молитвы, приведённые выше.
 

Молитва к Господу родителей о детях (жены о муже), находящихся на службе в армии.

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тери услы́ши мя, недосто́йную рабу́ [или недосто́йнаго раба́] (имя). Го́споди, в ми́лостивой вла́сти Твое́й ча́до мое́, [или супру́га моего́], раба́ Твоего́ (имя), поми́луй и спаси́ его́, И́мени Твоего́ ради́. Го́споди, прости́ ему́ все согреше́ния во́льные и нево́льные, соверше́нные им пред Тобо́ю. Го́споди, наста́ви его́ на и́стинный путь Твои́х за́поведей, и ра́зум просвети́ све́том Христо́вым во спасе́ние души́ и исцеле́ние те́ла. Го́споди, благослови́ его слу́жбу в а́рмии, на су́ше, во́здухе и в мо́ре, в пути́, лета́нии и плав́ании и на ка́ждом ме́сте Твоего́ влады́чества. Го́споди, сохрани́ его́ си́лою Честно́го и Животворя́щего Креста́ Твоего́ под кро́вом Твои́м святы́м от летя́щей пу́ли, стрелы́, меча́, огня́, от смертоно́сной ра́ны, во́дного потопле́ния и напра́сной сме́рти. Го́споди, огради́ его́ от вся́ких ви́димых и неви́димых враго́в, от вся́кой беды́, зол, несча́стий, преда́тельства и пле́на. Го́споди, исцели́ его́ от вся́кой боле́зни и ра́ны, от вся́кия скве́рны, и облегчи́ его́ душе́вные страда́ния. Го́споди, да́руй ему́ здра́вия и целому́дрия во вся́ком благоче́стии и любви́ в ми́ре и единоду́шии с окружа́ющими его́, нача́льствующими, бли́жними и да́льними людьми́. Го́споди, умно́жь и укрепи́ его́ у́мственные спосо́бности и теле́сные си́лы, здра́ва и благополу́чна возврати́ его́ в роди́мый дом. Всеблаги́й Го́споди, да́руй мне, недосто́йной и гре́шной рабе́ Твое́й [или недосто́йному и гре́шному рабу́ Твоему́] (имя), роди́тельское [или супру́жеское] благослове́ние на ча́до мое́ [или супру́га моего́] (имя) в настоя́щее вре́мя у́тра, дня, но́чи, и́бо Ца́рствие Твое́ ве́чно, всеси́льно и всемогу́щественно. Ами́нь.