Неделя 19-я по Пятидесятнице, глас 2-й, прав. отрока Артемия Веркольского

Тропарь воскресный, глас 2:

Егда́ снизше́л еси́ к сме́рти, Животе́ Безсме́ртный,/ тогда́ а́д умертви́л еси́ блиста́нием Божества́:/ егда́ же и уме́ршия от преиспо́дних воскреси́л еси́,/ вся́ си́лы небе́сныя взыва́ху:// Жизнода́вче, Христе́ Бо́же на́ш, сла́ва Тебе́.

(загрузить)

     

Тропарь преподобномученицы Елисаветы, глас 1:

Смире́нием досто́инство кня́жеское сокры́вши, / богому́драя Елисаве́то, / сугу́бым служе́нием Ма́рфы и Мари́и / Христа́ почти́ла еси́. / Милосе́рдием, терпе́нием и любо́вию себе́ предочи́стивши, / я́ко же́ртва пра́ведная Бо́гу принесла́ся еси́. / Мы же, чту́ще доброде́тельное житие́ и страда́ния твоя́, / я́ко и́стинную наста́вницу усе́рдно про́сим тя: / свята́я му́ченице вели́кая княги́не Елисаве́то, // моли́ Христа́ Бо́га спасти́ и просвети́ти ду́ши на́ша.

(загрузить)

     

Тропарь прав. отрока Артемия Веркольского, глас 2:

Вы́шняго повеле́нием, тучено́сным облако́м не́бо помрачи́вшим,/ и мо́лниям блиста́ющим,/ гро́му же возшуме́вшу с преще́нием,/ испусти́л еси́ ду́шу твою́ в ру́це Го́сподеви, прему́дре Арте́мие,/ и ны́не предстои́ши Престо́лу Влады́ки всех,/ о и́же ве́рою и любо́вию приходя́щим к тебе́, подая́ исцеле́ние все́м неотло́жно,// и моля́ся Христу́ Бо́гу, спасти́ся душа́м на́шим.

(загрузить)

     

Кондак воскресный, глас 2:

Воскре́сл еси́ от гро́ба, Всеси́льне Спа́се,/ и а́д ви́дев чу́до, ужасе́ся,/ и ме́ртвии воста́ша;/ тва́рь же ви́дящи сра́дуется Тебе́,/ и Ада́м свесели́тся,// и ми́р, Спа́се мо́й, воспева́ет Тя́ при́сно.

(загрузить)

     

Кондак преподобномученицы Елисаветы, глас 2:

Вели́чие по́двига ве́ры кто пове́сть: / во глубине́ земли́, я́ко в раи́ све́тлости, / страстоте́рпица вели́кая княги́ня Елисаве́та / со А́нгелы во псалме́х и пе́ниих ра́довашеся / и, убие́ние претерпева́ющи, о безбо́жных мучи́телех взыва́ше: / Го́споди, прости́ им грех сей, / не ве́дят бо, что творя́т. / Тоя́ моли́твами, Христе́ Бо́же, // поми́луй и спаси́ ду́ши на́ша.

(загрузить)

     

Сла́ва Отцу́ и Сы́ну и Свято́му Ду́ху:

Кондак прав. отрока Артемия Веркольского, глас 8:

Возсия́ днесь пресве́тлая па́мять прему́драго Арте́мия;/ Богода́нная благода́ть я́ко ре́ки/ излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся, с ве́рою прие́млюще я́, и взыва́юще:// ра́дуйся, Арте́мие Богому́дре.

(загрузить)

     

И ны́не и при́сно и во ве́ки веко́в. Ами́нь.

Тропарь иконы Богоматери "Утоли моя печали", глас 5:

Утоли́ боле́зни/ многовоздыха́ющия души́ моея́,/ Утоли́вшая вся́ку слезу́ от лица́ земли́:/ Ты бо челове́ков боле́зни отго́ниши/ и гpе́шных ско́pби pазpу­ша́еши,/ Тебе́ бо вси стяжа́хом наде́жду и утвеpжде́ние,// Пpесвята́я Ма́ти Де́во.

(загрузить)