Служба прп. Кассии песнописицы

На велицей вечерни

Предначинательный псалом и "Блажен муж". На "Господи воззвах" ставим стихов 8 и поем стихиры предпразднства подобны 4 и преподобной 4.

Стихиры преподобной, глас 4.

Воздержа́ния красоту́, де́вства оби́тель, доброде́телей одушевле́нное селе́ние, Касси́ю сладкогла́сую, гу́сли благода́ти, всему́друю песнетво́рицу, ны́не в па́мять ея́ собра́вшеся, воспои́м, благочести́вии, песнопе́ньми.

Ца́рства земна́го не сподо́билася еси́, царю́ тле́нному я́ко подоба́ше де́рзостне посмея́вшися, но воздержа́нием отличи́вшися, честны́ми велича́нии Христу́ обручи́лася еси́, всепе́тая, и в черто́зех жи́зни ве́чныя всели́лася еси́, Касси́е, багряни́цею доброде́телей сия́ющи.

Всеце́ло ся, всехва́льная, Влады́це веко́в покори́вши подви́жничества доброде́тельми, я́ко богому́драя, Ду́ха дохнове́ние стяжа́ла еси́, Касси́е, пе́сни медоточи́выя богому́дро воспе́вши Христо́вой Це́ркви, Я́же днесь песнопе́ньми почита́ет па́мять твою́.

Притекла́ еси́ к ми́ра благоуха́нию Жениха́ Кра́снаго твоего́, вся я́же в мíре оста́вльши, и превы́ше существа́ пожи́вши, в Ка́се до́бре сверши́ла еси́, Касси́е, путь земны́й твой, и востекла́ еси́ к Нему́, доброде́тельми украси́вшися, Его́же моли́ спасти́ сверша́ющия па́мять твою.

Слава, глас 6.

Днесь духо́вно украси́вшися, Це́рковь сверша́ет па́мять твою́, Касси́е преподо́бная, мона́шествующих красо́; сего́ ра́ди вси ве́рнии, в це́ркви собра́вшеся, сла́вим тя вопию́ще: ра́дуйся, ца́рскаго досто́инства и похвалы́ отре́кшаяся и за Царе́м Сла́вы по́двигом после́довавшая; ра́дуйся, чрез доброде́тель благода́тию Уте́шителя обогати́вшаяся, и Це́рковь благозву́чии пе́сней твои́х украси́вшая; ра́дуйся, сла́во преподо́бных, о́строва Ка́са украше́ние и предста́тельство непосты́дное. Но я́ко иму́щи дерзнове́ние ко Христу́, Та́инственному Жениху́ твоему́, моли́ Его́ о душа́х на́ших.

Вход. Свете Тихий. Прокимен дне. Паримии.

Притчей чтение, 31: 10, 13 – 20, 25

Премудрости Соломоновой чтение, 3: 1 – 9

Премудрости Соломоновой чтение, 5: 15 – 6: 3

На литии самогласны.

Глас 1:

Днесь, ве́рнии, Касси́я преподо́бная на пра́зднество све́тлое нас созва́; сего́ ра́ди че́стно его́ да сверши́м и та́ко да возопии́м: ра́дуйся, ца́рство земно́е я́коже подоба́ше посрами́вшая и сла́вы Ца́рства безсме́ртнаго вкуси́вшая; ра́дуйся, учи́лище подви́жническое на земли́ основа́вшая и бр́ака нескве́рнаго по́двиги твои́ми удосто́ившаяся; ра́дуйся, Ду́ха дунове́нием песнопе́вица сладкогла́сная Це́ркви явле́нная. Но я́ко име́ющи дерзнове́ние ве́лие, моли́ Христа́ мир вселе́нней дарова́ти и душа́м на́шим ве́лию ми́лость.

Глас 2:

На Христа́ вожделе́ннаго ти взира́ющи и на Ева́нгелие взо́ры обраща́ющи, обоже́ния плод подви́жнически собра́ла еси́, и над зми́ем мы́сленным в не́мощи естества́ восторжествова́ла еси́, Касси́е всепе́тая. Сего́ ра́ди, увенча́нная, в небе́сных лику́ющи, моли́ за ны, в пе́снех чту́щих честну́ю па́мять твою́.

Царя́ Небе́снаго, Христа́ Бо́га на́шего, неве́ста избра́нная нарекла́ся еси́, Касси́е всеблаже́нная, тле́нная земли́ отве́ргши и воздержа́ния труда́ми житие́ подви́жнически сверши́вши. Сего́ ра́ди во сла́ве жи́зни ве́чныя Жениху́ предстоя́щи, моли́ся Ему́ непреста́нно о сверша́ющих па́мять твою́.

Глас 4:

Днесь ра́дуется о́стров Кас, па́мять твою́ сверша́я, преподо́бная Касси́е Богопросла́вленная; на нем бо стра́нно пожила́ еси́ и на нем жи́зни по́прище сконча́ла еси́ в ми́ре; сего́ ра́ди и к ра́це, в не́йже положе́но бы́сть те́ло твое́ свято́е, с ве́рою притека́ет, я́ко исто́чник освяще́ния стяжа́в, благода́ть да́нную ти возвеща́яй и сла́вя в Тро́ице Бо́га, И́же просла́ви тя в блаже́нстве святы́х.

Глас 6:

По́чести мирсти́и всему́дро презре́вши, и подви́жнически житие́ преше́дши, де́вство воздержа́нием украси́ла еси́, и в безстра́стии да́нную ти благода́ть яви́ла еси́, Касси́е всепе́тая; сего́ ра́ди Христо́с, обре́т тя во всем бла́гу и непоро́чну, неве́сту тя Себе́ поя́т в бра́це нескве́рнем. Сего́ ра́ди моли́ Его́ спасти́ся душа́м на́шим.

Слава, глас тойже.

Преподо́бная ма́ти, Касси́е Богоблаже́нная, на брак с царе́м земны́м не избра́нная, любо́вию небе́сною Царю́ Безсме́ртному, Христу́ Бо́гу, обручи́лася еси́: сего́ ра́ди, и Крест Его́ в жи́зни преподо́бне взе́мши, пи́ра ве́чнаго Влады́чняго в черто́зе нерукотворе́ннем со сла́вою сподо́билася еси́. Сего́ ра́ди в ней ра́дующися, не преста́й помина́ти нас, в па́мять твою́ собра́вшихся и пою́щих твоя́ чудеса́.

И ныне. Предпразднства, глас тойже.

На стиховне стихиры глас 2, подобен “Егда от древа”

Егда́ ца́рства тле́ннаго сужде́нием царя́ земна́го лиши́лася еси́, ма́ти свята́я, тогда́ после́довала еси́ Ца́рствующему века́ми и яви́лася еси́ всекра́сная Ему́ неве́ста све́тлостию жития́ твоего́. Сего́ ра́ди при́сно моли́ Его́ о чту́щих тя любо́вию, Касси́е богоблаже́нная.

Стих: Терпя́ потерпе́х Го́спода и внят ми.

Из уст твои́х излия́ся благода́ть Ду́ха пе́сньми, Касси́е избра́нная, и Це́ркви гу́сли одушевле́нныя сладкозвучны́я тя соде́ла и псалти́рь боже́ственную, пе́сньми небе́сными всех веселя́щую. Сего́ ра́ди мы, ве́рнии, днесь по до́лгу песнь тебе́ прино́сим во всесвяту́ю па́мять твою́.

Стих: И поста́ви на ка́мени но́зе мои́ и испра́ви стопы́ моя́.

Ра́дуйся, песнопе́ние сладча́йшее Це́ркви Христо́вой, Касси́е всеблаже́нная, ра́дуйся, сладкогла́сая свире́ль благода́ти, ра́дуйся, гусль благоче́стия та́инственная, ра́дуйся, пти́це красногла́сой ве́ры, ра́дуйся, всепе́тая, веселя́щи наро́д Изра́иля но́ваго я́ко Дави́д ины́й.

Слава, глас 8.

Прии́дите, ве́рнии, преподо́бную Касси́ю в пе́снех возсла́вим, я́же по́двигом воздержа́ния естество́ покори́, Це́рковь Христо́ву боже́ственными сладкозву́чии пе́сней украси́, и правосла́вных мно́жество целому́дрия испо́лни; днесь бо па́мять ея́ всепра́зднственная я́ко звезда́ всесве́тлая возсия́, луча́ми даро́в благода́ти сия́ющи и освеща́ющи вся ея́ ра́ди собра́вшияся и прославля́ющия Бо́га Тро́ицу, спаса́юща ду́ши на́ша.

И ныне, глас той же, предпразднства.

Ныне отпущаеши… Трисвятое. По Отче наш

Тропарь, глас 1.

Ца́рства вре́меннаго красоты́ не сподо́билася,/ но прича́стница Ца́рства Вы́шняго яви́лася еси́, Касси́е,/ житие́ свято́е преше́дши/ и пе́сни сла́дкия воспе́вши;/ сего́ ра́ди моли́ся непреста́нно о нас, /любо́вию зову́щих:/ сла́ва Просла́вльшему тя Христу́,// сла́ва нам Дарова́вшему тя засту́пницу неусы́пную.

Слава, той же. И ныне, предпразднства.

На утрени.

По первой кафизме седален глас 1, подобен “Гроб Твой”.

Ра́дуется Це́рковь свята́я Христо́ва, па́мять твою́ свяще́нную в пе́снех сверша́ющи, яви́лася бо еси́ песнопи́сица Ея́ сладкогла́сая, со́нмы христиа́н при́сно красото́ю пе́сней твои́х услажда́ющи, Касси́е блаже́нная.

Слава, глас тойже.

Доброде́телей ви́дами украси́вшися вся́ческими, по́двигами воздержа́ния твои́ми непреста́нными в ски́нию пренебе́сную вошла́ еси́ пресла́вне, Касси́е всеблаже́нная, с де́вы прему́дрыми наслажда́ющися красото́ю Жениха́ твоего́.

И ныне, той же, предпразднства.

По второй кафизме седален, глас 3, подобен “Веры Божественней”

Я́ко цари́ца преиспещре́на доброде́телей твои́х украше́ньми, в черто́зе жизни лу́чшия Царю́ Ве́чному предстои́ши, Касси́е, жен благоле́пие. Сего́ ра́ди моли́ Христа́ Бо́га, всесла́вная, дарова́ти нам ве́лию ми́лость.

Слава, глас тойже.

Благода́ти Бо́жией соизволе́нием пе́сни Це́ркви истка́ла еси́, сердца́ ве́рных ра́дующи и к любви́ Боже́ственней возводя́щи, Касси́е, святы́х украше́ние. Сего́ ра́ди моли́ Христа́ Бо́га, всесла́вная, дарова́ти нам ве́лию ми́лость.

И ныне, той же, предпразднства.

По полиелеи седален, глас 4.

Христу́ после́довала еси́, душ Возлю́бленному, и Ему́ соедини́лася еси́ воздержа́ния по́двигами, естество́ победи́вши; оста́вила еси́ вся́кую тщету́ я́же в ми́ре; богому́дре сверши́ла еси́ житие́ изря́дное; сего́ ра́ди моли́, Касси́е, усе́рдно о нас.

Слава, глас тойже.

Благода́ти си́лою вмужи́вшися, свята́я, в по́двизе воздержа́ния запина́теля дре́вняго му́жески низпрове́ргла еси́, ли́ки безтеле́сных служи́телей возра́довавши, нетле́нным венце́м сла́вы украси́лася еси́; сего́ ра́ди моли́, Касси́е, усе́рдно о нас.

И ныне, глас тойже, предпразднства.

Степенны.

Прокимен:

Терпя́ потерпе́х Го́спода и внят ми.

Стих: И поста́ви на ка́мени но́зе мои́ и испра́ви стопы́ моя́.

Евангелие. 50 Псалом.

Слава: Моли́твами Святы́х Твои́х…

И ныне: Моли́твами Богоро́дицы…

Кано́н преподо́бной, его́же краегране́сие по алфави́ту обраще́ну, в Богоро́дичных же «Кири́лла». Глас 8.

Песнь 1.

Ирмо́с: Колесницегони́теля фарао́ня…

Красота́ми украси́вшися, всесла́вная, жития́ подви́жническаго, Женихо́м Та́инственным обогати́лася еси́, Христо́м, к Нему́же уста́ми мо́лишися, всеблаже́нная Касси́е: да́ждь ми сло́во, да досто́йно воспою́ Тя.

Ду́шу зра́ком доброде́телей благоле́пно украси́вши, Касси́е, благода́ть прия́ла еси́ усты́ святы́ми свои́ми, и́миже Богодухнове́нне начерта́ла еси́ Це́ркви пе́сни, всехва́льная, Я́же и хва́лит тя во ве́ки.

Красота́ Христо́ва та́инственно, Касси́е, ду́шу твою́ восхи́ти; сего́ ра́ди удали́лася еси́ ми́ра суеты́, и в не́мощи естества́ злонача́льника зми́я по́двиги победи́ла еси́ и да́же до земли́ его́ смири́ла еси́.

Богородичен. Прибе́жище мое́ необори́мое и си́ла Ты еси́, Ма́ти Пренепоро́чная, и в Тебе́ аз окая́нный и́мам наде́жду; предста́ни у́бо, Влады́чице, от бед и напа́стей живо́т мой избавля́ющи, я́ко да благогове́йно ублажа́ю Тя.

Песнь 3.

Ирмо́с: Утвержде́й в нача́ле Небеса́…

Све́та дела́ на земли́ соде́явши преподо́бно, Све́ту мы́сленному сочета́лася еси́ в селе́ниих избра́нных, я́ко избра́нна еси́, Касси́е Богому́драя, и свет вторы́й ве́рным возсия́ла еси́.

Разсужде́нием высоча́йшим, Касси́е, прему́дро смире́ние Христо́во избра́вши, сокро́вища благода́ти подви́жнически восхи́тила еси́, и в доброде́телех и́стинно яви́лася еси́ я́ко вели́кий купе́ц.

Я́ко благоразу́мна часть благу́ю избра́вши, в безстра́стия багряни́цу облекла́ся еси́, и яви́лася еси́, всеславная Касси́е, дщерь пресла́вная Царя́ Небе́сных Сил.

Богородичен. Пресу́щно Сло́во О́тчее во вре́мени роди́вши, Ма́терним дерзнове́нием Твои́м моли́ Его́ непреста́нно, Ма́ти, да избе́гнем огня́ мра́чныя гее́нны, покланя́ющиеся Рождеству́ Твоему́.

Седален. Глас третий.

Кто ти принесе́т хвалу́ досто́йну и воспое́т тя по достоя́нию пе́сньми? Ты бо на земли́ а́нгельски в по́двизех пожила́ еси́, и чино́в А́нгельских дости́гла еси́ в вы́шних, с ни́миже предстоя́щи не преста́й моли́тися о любо́вию сверша́ющих па́мять твою́, Касси́е освяще́нная.

Слава. Чу́вства плотски́я умертви́вши, я́же превы́ше чувств нача́тки,  Касси́е,  мати́ свята́я, бога́тно насле́дила еси́ и плода́ сла́дкаго обоже́ния вкуси́вши, предста́ла еси́ с ли́ки святы́х Тро́ице, с ни́миже моли́ ми́лость и благода́ть дарова́ти соверша́ющим па́мять твою́.

И ныне. Предпразднства.

Песнь 4

Ирмос: Ты моя́ кре́пость Го́споди…

Распя́вшися страсте́м, да́ры невеще́ственныя прия́ла еси́, и дости́гла еси́, ма́ти, внутрь невхо́дных сия́ния Госпо́дня.

Яви́лася еси́, о Касси́е, песнописа́нии свои́ми вити́я неизреченныя сла́вы Царя́ Сил да́же до коне́ц земли́.

Произвела́ еси́, сла́вная, всепло́дие небе́сное безстр́астия, бразды́ се́рдца своего́ слез дождя́ми напита́вши.

Богородичен. Струю́ невеще́ственну изле́й мне, бла́гостию Ма́тернею Свое́ю прохлажда́ющи се́рдце мое́, жего́мое в горни́ле страсте́й, Присноде́во.

Песнь 5

Ирмос: Вску́ю мя отри́нул еси́…

Всеце́ло ся поже́рши, всесла́вная, Ца́рствующему над вся́кою тва́рию, отложи́ла еси́ о привре́менных попече́ние, и пра́ведность, Касси́е, возде́лавши, селе́ния пра́ведных сподо́билася еси́.

Устрани́вшися всеце́ло тиме́нныя тщеты́, пресла́вная, и Хри́сту Спа́су по́двигом сораспя́вшися, в едине́нии Боже́ственнем, преподо́бная ма́ти Касси́е, Тро́ичным Сия́нием наслади́лася еси́.

Победоно́сна яви́лася еси́, губи́теля де́мона не убоя́вшися, преподо́бная, и зло́бы его́ безме́рныя; сего́ ра́ди Бог украси́ тя нетле́нным венце́м благоле́пия.

Богородичен. Да яви́ши на мне, Де́во, безме́рное благоутро́бие Твое́, изри́ни мя бе́дствующа из бла́та страсте́й и наста́ви мя Ма́терним промышле́нием Твои́м на покая́ния путь спаси́тельный.

Песнь 6.

Ирмос: Очи́сти мя, Спа́се…

Сла́сти плотски́я угаси́вши, Касси́е, по́двигом, благода́ть Ду́ха прия́ла еси́, и из се́рдца твоего́ излила́ еси́, ма́ти, Бо́гу хвале́ние.

Ду́шу просвети́вши благода́ти виде́нии, преподо́бная Касси́е, стяжа́ла еси́ язы́к свой я́ко трость кни́жника и́стинно скоропи́сца, пе́сни хвале́бныя сочини́вшая.

Се́рдце твое́, е́же прия́вшее сла́дости ток безмез́дный, от реки́ Ду́ха источи́ струи́ пе́сен сладча́йшия, ма́ти, при́сно лю́ди Бо́жия веселя́щия.

Богородичен. Свеще́ Све́тлая Та́инственнаго Сия́ния, Твою Лучу́, свяще́нно просия́вшую, источи́, Всесвята́я, се́рдцу моему́, омраче́нному страстьми́.

Кондак, глас 4.

Егда́ житие́ равноа́нгельно/ прешла́ еси́ тве́рдым по́двигом твои́м,/ свята́я ма́ти Касси́е,/ Жениха́ поя́ла еси́ Го́спода;// Его́же моли́ о воспева́ющих тя.

Икос.

Е́же по досто́янию песнопе́ния истка́ти ти никто́же от земноро́дных дово́лен есть, и хвалу́ я́ко подоба́ет принося́ща ти несть в челове́цех, Касси́е преподо́бная всехва́льная; тако́ бо пе́рвенствует краснозву́чный язы́к твой, и́же песнопе́ньми свяще́нными просвети́ Це́ркви благоле́пие и правосла́вных со́нмы ра́дости испо́лни. Оба́че прости́ мя, неиску́снаго, реку́ща и глаго́люща: я́ко не и́мам благода́ти, да прии́дет на мя сия́ние твое́, ма́ти, и да просвети́т мене́ пе́ти тя, ве́ры си́рина сла́достна, свире́ль доброгла́сну, ла́стовицу сладкозву́чну, преподо́бную в жена́х, Богодухнове́нно Го́спода и Бо́га воспе́вшую; Его́же моли́ о воспева́ющих тя.

Песнь 7

Ирмо́с: Бо́жия снизхожде́ния…

Привре́менныя тщеты́ отступи́ла еси́, я́ко да обогати́шися свы́ше, и на гу́слех свои́х дави́дски бряца́ющи, Касси́е, хвалу́ возгласи́ла еси́ Го́споду.

Любо́вию Боже́ственною возже́гшися, те́рния сласте́й попали́ла еси́, и я́ко земля́ до́брая, преподо́бная Касси́е, стори́цею прозябла́ еси́ плоды́ благоче́стия.

Воспе́ла еси́ Го́спода Вы́шних в це́ркви вели́цей богодухнове́нно; Дух бо Его́, Касси́е блаже́нная, я́ко бряца́ло воздви́же сладкозву́чный язы́к твой.

Богородичен. Просвети́, Ма́ти, ду́шу мою́, благода́ти Твоея́ безме́рным светозаре́нием,  Свет ми́ру, Христа́ Жизнода́вца па́че естества́ заче́нши, на спасе́ние челове́ком.

Песнь 8.

Ирмо́с: Седмери́цею пещь…

Подви́жническим ве́трилом твои́м, преподо́бная, преплы́вши мо́ре бу́ри жите́йския, в приста́нище вошла́ еси́ Ца́рствия Бо́жия.

И́мать тя Кас в треволне́ниих напа́стей, Касси́е, приста́нище тиша́йшее, сего́ ра́ди по до́лгу сверша́ет па́мять твою́.

Си́лу прия́вши свы́ше пе́сни тка́ти, возвели́чила еси́ и́мя Го́спода, И́же тя прославля́ет, Касси́е преподо́бная.

Богородичен: Прибе́жище, Де́во, в мо́ри напа́стей, моли́твами Твои́ми бу́ди ми благода́ть, да просла́влю Тя, Благода́тную.

Песнь 9

Ирмо́с: Ужасе́ся о сем Не́бо…

Пристра́стия земна́го, мирска́го попече́ния же и сво́йства дале́че отстоя́ла еси, Касси́е, Бо́гу угожда́я моли́твами, посто́м, бде́нии и вся́каго чу́вства хране́нием; сего́ ра́ди чудесы́ просла́вилася еси, и лико́м Святы́х сопричла́ся еси́, достосла́вная.

Цари́ца позна́лася еси́ всесла́вная, над страстьми́ плотски́ми воцари́вшися, и Царю́ Небе́сному, Касси́е, предста́ла еси́ блиста́ющи ри́зою безстра́стия; Сего́ у́бо моли́ ми́лость и мир дарова́ти прославля́ющим тя.

Пе́сней изря́дных песнотво́рицу, святы́х песнопи́сцев похвалу́,  гу́сли сла́дкия Це́ркви Христо́вой, орга́н благода́ти, восхище́ние Боже́ственное серде́ц всех правосла́вных, Касси́ю в пе́снех, прииди́те, празднолю́бцы, почти́м.

Богородичен. Пресвята́я Де́во, неискусобра́чно Изба́вителя родила́ еси́ во вре́мени, я́коже дре́вле Ду́хом Святы́м чу́днии проро́цы  провозвести́ша, сего́ ра́ди мо́лим Тя усе́рдно: не преста́й моля́ся Ему́, Богороди́тельнице, поми́ловати поющи́я Тя.

Светилен преподобной

Подви́жнически страсте́й теле́сных совле́кшися, доброде́тельми твои́ми све́тлу багряни́цу стяжа́ла еси́ и Царю́ Нетле́нному та́инственно обручи́лася еси́, в дар бра́чный пе́сни твои́ прине́сши, Касси́е, Ему́же ны́не со сла́вою предстоя́, моли́ со дерзнове́нием о воспева́ющих тя.

Ин светилен

Ра́дуется Кас, па́мять твою́ святу́ю днесь соверша́я в све́тле торжестве́, на сем бо е́же в мíре житие́ оста́вивши, соде́лала еси́ гроб твой святы́ни исто́чник, Касси́е, ве́рою к нему́ притека́ющим и Христа́ сла́вящим, Кра́снаго Жениха́ твоего́.

На хвалитех ставим стихов 4 и поем стихиры подобны.

Глас 2, подобен “Киими похвальными”.

Ки́ими похва́льными венцы́ увязе́м тя, преподо́бная? Заве́ты Ева́нгельския любо́вию к жи́зни бу́дущей сверши́вшую и при́сной Го́споду соде́явшуюся; ми́ра тщету́ отве́ргшую любо́вию к нас ра́ди Вочелове́чшемуся; Касси́ю блаже́нную, лику́ющу в Рая́ широте́ и благода́ть подаю́щу пе́сньми сла́вящим ю.

Ки́ими сладкозву́чными пе́сньми воспое́м тя, преподо́бную? Сла́вы мни́мыя в черто́зе добро́ты лиши́вшуюся судо́м царя́ земна́го; труда́ми воздержа́ния досто́йне стяжа́вшую дина́рий Ца́рствия; Касси́ю, обручи́вшуюся Сло́ву, Христу́, Царю́ веко́в и Сего́ моля́щую ми́р на́м дарова́ти.

Ки́ими пе́сенными красота́ми увенча́ем тя, преподо́бную? Ты бо из сокро́вища благода́ти исхити́ла еси́ бога́тство прему́дрости непреста́нными по́двиги честны́ми, и пе́сни мусики́йски украси́вши, Богодухнове́нне Це́рковь возвесели́ла еси́, Я́же ны́не любо́вию па́мять твою́ соверша́ющи, богоно́се Касси́е, прославля́ет Го́спода во Еде́ме тя просла́вльшаго.

Ки́ими ра́достными пе́нии возсла́вим тя, преподо́бную? Ты бо чи́стому Жениху́ твоему́ в дар я́ко же́ртву житие́ подви́жническое принесла́ еси, и в черто́г Его́ бра́чный вше́дши, причасти́лася еси́ ра́дости бра́ка Боже́ственнаго. Сего́ ра́ди, име́я дерзнове́ние к Нему́, Касси́е, моли́ непреста́нно спасти́ся с ве́рою па́мять твою́ в пе́снех сверша́ющим.

Слава, глас 8.

Прииди́те днесь, ве́рнии, преподо́бную Касси́ю восхва́лим, се бо предстои́т нам у ра́цы боже́ственныя ея́, да́ры благода́ти устроя́ющи. Вкуси́м у́бо от них, до конце́в земли́ возвеща́юще, каково́й сла́вы сия́ удосто́ися, мона́хов украше́ние, де́вства красото́, селе́ние безстра́стия, гу́сли сладкозву́чнии Це́ркви Христо́вой и песнопе́вцев похвала́; че́сти ца́рския лиши́вшися, благу́ю часть избра́ и вме́сто порфи́ры ца́рския в оде́жды мона́шестии облече́ся. Сего́ ра́ди, а́нгельски пожи́вши, со А́нгелы жития́ удосто́ися и мо́лит Бо́га о ми́ре вселе́нней и спасе́нии душа́м на́шим.

И ныне, глас тойже, предпразднства.

На Литургии.

Причастен: В па́мять ве́чную бу́дет пра́ведник…

Величание: Ра́дуйся, Касси́е богоно́сная, Це́ркви прекрасногла́сая свире́ле, ра́дуйся, в ми́ре преподо́бне пожи́вшая и ны́не в вы́шних Го́спода воспева́ющая.