Стихиры на стиховне из 1-й службы преподобномученице Елисавете

Стихира 1-я на стиховне из 1-й службы преподобномученице Елисавете, глас 3:

Сла́вою ца́рственною на земли́ осия́нная, / Ца́рство Бо́жие внутрь себе́ име́ла еси́, Вели́кая княги́не Елисаве́то, / сего́ ра́ди нело́жно нарекла́ся еси́ ца́рственная му́ченица/ и вене́ц многоце́нный прия́ла от Царя́ Сла́вы, Христа́,// Ему́же соца́рствуеши ны́не.

(загрузить)

     

Стихира 2-я на стиховне из 1-й службы преподобномученице Елисавете, глас 3:

Стих: Ди́вен Бог во святы́х Свои́х, // Бог Изра́илев.

Ца́рство Небе́сное вблизи́ нас есть: / ца́рствует бо Госпо́дь во святы́х Свои́х; / Его́же моли́, Елисаве́то, ца́рственная му́ченице, / да изба́вит нас покая́нием мучи́тельства де́монскаго // и воцари́тся в душа́х на́ших во ве́ки.

(загрузить)

     

Стихира 3-я на стиховне из 1-й службы преподобномученице Елисавете, глас 3:

Стих: В це́рквах благослови́те Бо́га, // Го́спода от исто́чник Изра́илевых.

Госпо́дь, прие́мляй сла́ву от А́нгел и свиде́тельство святы́х, / да прии́мет ны́не покая́ние на́ше, / моли́, ца́рственная му́ченице Елисаве́то, / и отврати́т гнев Свой пра́ведный от оте́чества на́шего // и ми́лостив пребу́дет к прославля́ющим тебе́.

(загрузить)

     

Сла́ва Отцу́ и Сы́ну и Свято́му Ду́ху:

Стихира на «Слава» на стиховне из 1-й службы преподобномученице Елисавете, глас 7:

При́зри, Елисаве́то, на предстоя́щих и моля́щихся ти / от све́тлаго черто́га, иде́же со святы́ми упокоева́ешися: / ви́ждь, а́ще мно́зи в нас суть добри́ и вели́цы, / или́ прему́дри, или́ кре́пцы, или́ пра́ведни? / От четы́рех бо ветр со́брани бы́хом, / я́ко ладьи́, в бу́рях мо́ря жите́йскаго до зела́ обетша́вше; / стра́стными треволне́ньми сокруше́ни корми́ла на́ша, / ве́трила раздра́ни наси́льством сопроти́вных, / от ка́мений подво́дных — бесо́вских прило́г — избоде́ни есмы́, / вма́ле не погибо́хом в пучи́не, отягче́ни беззако́ньми на́шими. / Непотре́бни есмы́, но твои́ми моли́твами поми́ловани бы́вше, / покая́ние от се́рдца Го́сподеви принося́ще, / мо́лим тя: наста́ви нас на путь пра́веден, / его́же держа́щеся, дости́гнем ти́хаго и вожделе́ннаго приста́нища, // е́же есть Ца́рствие Христо́во Небе́сное.

(загрузить)

     

И ны́не и при́сно и во ве́ки веко́в. Ами́нь.

Богородичен, глас 7:

Под кpов Твой, Влады́чице, / вси́ земноpо́днии пpибега́юще, вопие́м Ти: / Богоpо́дице, упова́ние на́ше, / изба́ви ны от безме́pных пpегpеше́ний, // и спаси́ ду́ши на́ша.

(загрузить)