Служба преп. Лукиана Александровского

Тропарь, гл. 4

Приспе день торжества святых земли Владимирския/ и память преподобных отец Александровских/ Лукиана, добродетели жилищем светлым ся сотворшаго/ и Корнилия, силою Божиею диавола поправшаго/ молитеся ко Господу, двоице преславная/ да дарует нам, во гробех греха сущим// воскресение и велию милость.

Кондак, гл.3

Днесь преподобнии отцы Лукиан и Корнилий/ предстоят невидимо Владычице Небесной/ и с лики святых за ны молятся Деве:/ спаси, Мати Божия, люди, на Тя уповающия/ покрый я от бед и страстей милосердия ризою/ и поклонитися сподоби Христу Воскресшему// Пасху празднующе вечную.

ВЕЧЕРНЯ.

Стихиры на Господи воззвах, гл. 1. Подобен: Небесных чинов радование:

Приидите, монаси и мирстии,/ воспоим Господа Единаго/ в скорбех Помощника и радости Подателя/ всем вся на пользу Творящаго/ Силу сильных и Укрепление немощных/ Владыку живота и Воскресения/ Истиннаго Учителя пасомых и пастырей/ Даровавшего земли нашей чудотворцев дивных/ преподобных Лукиана и Корнилия/ ихже святым предстательством, Христе,// спаси души наша.

Восхвалим, вернии/ Лукиана монаха добраго/ дерзновение пред Господем стяжавшаго/ заповедем преданнаго, житием чистаго/ молим тя, отче преподобне,/ буди нам отец чадолюбивый/ и духовный наставник искусный// да тобою водимии, спасемся.

На Промысел Божий присно надеявся,/ добре преплыл еси живота течение/ вся от руки Господни с благодарением принимая,/ отгнал еси от сердца обиды горькия/ и опечаливших тя прощал еси/ темже награди тя Владыка сторицею/ душу сподобив веселия божественнаго// и тело нетлением и чудесы прославив.

Глас 5, Подобен: Радуйся, Живоносный Кресте:  Радуйся, Лукиане чудотворче,/ яко вера твоя спасе тя воистину/ и прошение твое ко Господу исполнися/ срадуемся и мы тебе, отче преподобне/ се, бо обитель твоя молитвами твоими возрождается/ и светло светит людем, в житейстем мори сущим, скорбьми обуреваемым/ и Жертва Пречистая о всех зде совершается// и да будет тако до скончания века.

Радуйся, Лукиане отче наш/ лозы Христовы рождие доброе/ плод сторичный принести Богу потщавыйся/ таинствы благодатными душу просветил еси/ и повелении Господними ум освященный приобрел еси/ темже молитвами твоими светлыми/ омрачения греховнаго и тьмы вечныя избегнути надеемся// и сыны Света нарещися уповаем.

Слава, гл.6: Благодарим Тя, Дево Всепетая,/ яко явлением цельбоносныя иконы Рождества Твоего/ обитель сия украшается/ и святостию угодников Христовых Лукиана и Корнилия// поныне прославляется.

И ныне: Праздника

Стихира на литии, гл.1:

Небо Благодатное, звездами светлыми усеянное/ Ты еси, Богородице,/ посреде них Лукиан угодник Божий дивный/ сокровище на Небеси себе собравый/ и в обитель райскую душу свою претворивый,/ сподоби ны, Мати Чистая, в мире сем пожити праведно,/ подражая славному Твоему молитвеннику// и в обители вышния преселитися.

Стихиры на стиховне, гл.7: 

От чрева матерня молитвою освященный/ образ благочестия в родителех твоих обрел еси/ путь делания иноческаго измлада избрал еси/ крест свой мужественне понесл еси / на древо Крестное Спасителево присно взирая/ от сопостата искушен быв люте/ помощь и молитва искушаемым явился еси/ и нас от бед и обстояний избави// Лукиане преподобне отче наш. 

Стих: Терпя потерпех Господа, и внят ми и услыша молитву мою.

На высоту добродетели восшел еси/ вкупе со отцем твоим Димитрием/ иже яко Авраам Исаака на заколение Богу жертвенное/ благослови тя на подвиг монашеский,/ сиесть миру суетному умирание/ и со страстьми борение тяжкое // и Христу сораспятие. 

Слава, глас тойже: 

Радуйся, Лукиане отче наш/ возлюбивый Господа и Пречистую паче земных твоих родителей/ правду паче всякия льсти и лукавства/ уединение святое и молчание паче пустословия празднаго/ снеди скудныя паче чреву угождения/ житие многоскорбное паче веселия суетнаго// тем и достоин явился еси многия любве Божия.

И ныне: Праздника.

Тропарь, гл. 4

Приспе день торжества святых земли Владимирския/ и память преподобных отец Александровских/ Лукиана, добродетели жилищем светлым ся сотворшаго/ и Корнилия, силою Божиею диавола поправшаго/ молитеся ко Господу, двоице преславная/ да дарует нам, во гробех греха сущим// воскресение и велию милость.

УТРЕНЯ.

Седален по первой кафизме, гл.4.

Воистину свята земля сия,/ есть бо место таинственнаго к Богу душ многих восхождения,/ мученичества за Христа бескровнаго// и с Нимже воскресения светлаго.

И ныне: Праздника

Седален по второй кафизме, гл.4.

Исцели души наша немощныя/ Лукиане отче преподобне/ уврачуй язвы греховныя/ ослаби приражения страстей// и здравие душевное и телесное подаждь нам молитвами твоими.

И ныне: Праздника

Седален по полиелеи, гл.2 

Кто взыдет на гору Господню/ или кто станет на месте святем Его/ и наставник монахов наречется велий/ токмо сердцем чист и душею непорочен/ Лукиан преподобный и праведный/ ангелы собеседники имевый/ и от человеков ныне ублажаемый/ буди свет душам нашим, отче// и молися за ны пред престолом Господа Всевышняго. 

Стихира по 50 псалме, гл.6.

Яко покаяния подвижника изряднаго,/ утвердил есть Господь сердце твое чисто/ и дух прав обновил во утробе твоей/, не отъял от тебе Духа Своего Божественнаго,/ но радостию спасения воздал тебе щедро/ темже Лукиане, отче наш/ научи ны каятися Богу со смирением// да помилует нас по велицей Своей милости.

Канон, гл.1

Песнь 1.

Твоя победительная десница/ боголепно в крепости прославися/ та бо Безсмертне яко всемогущая противныя сотре// израильтяном путь глубины новосоделавшая. 

Песнь воспоим Богу Вседержителю/ и восхвалим силу Его прославльшаго/ Лукиана преподобнаго, раба благаго и вернаго// ангела земнаго и человека небеснаго. 

Твою победительную десницу/ прославляем днесь, Боже наш/ та бо изводит из рова страстнаго и из пустыни скорбныя/ души, спасения возжадавшия.

Слава: Память твою светлую празднующия,/ озари ны, грехом омраченныя/ Троицы светом Божественным и несозданным// егоже ныне зриши несредственне, Лукиане, отче наш. 

И ныне: Услыши прошения наша, Владычице/ в день печали Тебе возносимыя/ молят Тя святии земли Владимирския вкупе с преподобныма Лукианом и Корнилием/ и помощь Твою всебогатую нам ниспошли.

Песнь 3. 

Едине Ведый человеческаго естества немощь/ и милостивно в не воображься/ препояши ны с высоты силою/ еже вопити Тебе:// Свят одушевленный Храм неизреченныя Твоея славы, Человеколюбче. 

Спасение свое бодро по вся дни совершал еси/ един Единому Господу работая,/ благодатию и силою свыше препоясанный/ постом и молитвою страсти победил еси// и в покой Божественный вшел еси яко до конца претерпевый.  

Завету Христову следовал еси, Лукиане святе/ и враты тесными потщался еси Царства достигнути/ от врага борим быв/ скорбьми и лишении горькими// смирением уязвил тя язвящаго и потопил еси вся козни вражии покаянием слезным. 

Слава: Притрудно бысть начало пути твоего иноческаго/ преподобне Лукиане, отче наш/ воздержанием плоть свою изнурил еси,/ в подвизех не ослабевая// и точию средины лет достигнув, был еси яко старец, сединами убеленный. 

И ныне: Бога Истиннаго и Человека естеством родила еси, Дево,/ Честнейши всякия твари Явльшися,/ хвалим Тя и Господу поем:// Свят одушевленный Храм неизреченныя Твоея славы, Человеколюбче.

Седален, гл.1 

Трикраты вопрошал еси, Господи, апостола Твоего верховнаго:/ любиши ли Мя, Петре;/ испытати того желая,/ такожде и преподобнаго Лукиана не единожды удалял еси от святаго места сего,/ увидев же произволение его доброе,/ вселил зде избранника Своего и рекл еси ему:// Паси овцы Моя и буди пастырь добрый стаду Моему избранному.

Слава: Марие, Мати Божия,/ да будет обитель Твоя дом прибежища и пристанище благоотишное/ всем хотящим жати спасения и жизни вечныя.

И ныне: Праздника

 

Песнь 4.

Гору Тя благодатию Божиею приосененную/ прозорливыма Аввакум усмотрев очима/ из Тебе изыти Израилеву провозглашаше святому// во спасение наше и обновление.

Место свято и благодатию Божиею приосененное/ прозорливыма Лукиан усмотрев очима/ идеже виноград духовный насадити имать Десница Божия// во спасение многих и обновление.

Храмостроитель быв усердный, отче преподобне/ церковь Рождества Богородицы возвел еси/ идеже образ чудотворный яко светильник на свещнице поставил еси// моления теплыя пред ним возсылая.  

Едино от Господа просил еси, отче/ еже жити тебе в дому Господни/ и присещати святый храм Его и молитися о пастве твоей// Духом Святым ти вверенней.

Слава: Лукиане, пастырю освященный и ревностный/ не токмо о храмех рукотворенных усердствовал еси,/ но прежде в чистоте хранити сердце наставляя// яко Богу Престол и Жертвенник живый.  

И ныне: Богородице, иноком Отрадо Благодатная,/ девственником Славо и Укрепление/ помози нам целомудренно в веце сем пожити// и души чисты Христу предуготовати.

Песнь 5.

Просветивый сиянием пришествия Твоего, Христе/ и осветивый Крестом Твоим мира концы/ сердца просвети светом Твоего богоразумия// православно поющих Тя. 

Свету тезоимените, Лукиане, отче честный,/ во свет истины евангельския облеклся еси/ и древо светлоплодовитое явился еси// монахов множество произрастившее.  

Лампады во храме твоем, аще и разорен есть, не угасают,/ возжены бо верою твоею светлою/ и полны суть огня святаго и безсмертнаго// имже души верных осияваеши. 

Слава: Свеща светлая, молитвою чистою пламенеющая/был еси, Лукиане достоблаженне/ научи ны молитися Богу Духом и истиною// таковых бо поклонников ищет Господь.  

И ныне: Светоприемница сущи, Пламень Невещественный во чреве Носящая,/ Отроковице Нескверная и Мати Чистая,/ просвети нас светом Чада Твоего Божественнаго,// православно поющих Тя.

Песнь 6. 

Обыде нас последняя бездна/ несть избавляяй/ вменихомся яко овцы заколения/ спаси люди Твоя, Боже наш,// Ты бо крепость немощствующих и исправление. 

Юрод Христа ради явился еси,/ отче Лукиане/ наветы ложныя на пользу души обращая/ и похвалы хуждши поношения вменяя,// и клеветника древняго тем посрамил еси. 

Силен духом и верою богат быв,/ Лукиане святе/ нивочтоже себе вменял еси,/ источник всякаго блага в Бозе полагая// в Немже крепость немощствующих и исправление.  

Слава: Видя подвиги твоя тайныя,/ Лукиане мудре,/ воздаде тебе Отец Небесный яве/ и вознесл тя во время// темже и нас от славолюбия лукаваго сохрани.  

И ныне: Буди милость Твоя на нас,/ Дево Непорочная,/ без покаяния не остави грешныя рабы Твоя/ от осуждения страшнаго избави ны// Ты бо крепость немощствующих и исправление.

Кондак, гл.3

Днесь преподобнии отцы Лукиан и Корнилий/ предстоят невидимо Владычице Небесной/ и с лики святых за ны молятся Деве:/ спаси, Мати Божия, люди, на Тя уповающия/ покрый я от бед и страстей милосердия ризою/ и поклонитися сподоби Христу Воскресшему// Пасху празднующе вечную.

Песнь 7.

Тебе умную, Богородице, пещь/ разсмотряем вернии:/ якоже бо отроки спасе три Превозносимый, мир обнови/ во чреве Твоем всецел/ хвальный отцев Бог и препрославлен.

Искал и обрел еси Бисер драгий, Христа Желаемаго/ избави ны от сребролюбия и стяжательства суетнаго,/ нищетою же духовною обогати ны,// Лукиане досточудне.

Утушил еси страстей море пламенное/ хладом страха Божия/ и уныние пагубное упованием на Бога победил еси/ Емуже вопия присно:// не моя воля, но Твоя да будет, Господи. 

Слава: На камени Божиих заповедей/ дом души твоея устроив/ не убоялся треволнений житейских и болезней телесных/ и отразил еси соблазны вражия,// имже надлежит приити, по слову Христову. 

И ныне: Из рода небеснаго произшедшаго/ разсмотряем, вернии/ Лукиана преподобнаго, молитвы делателя изряднаго/ Богородицы избранника// двема обителема Владычицу прославльшаго.

Песнь 8.

В пещи отроцы Израилевы/ якоже в горниле/ добротою благочестия чистее злата блещахуся, глаголюще:/ благословите вся дела Господня, Господа// пойте и превозносите во вся веки. 

Благодать, в тебе живущая/ влече совета ищущих,/ слово твое, седмерицею скорбей очищенное, печали утоляше многия/ и странных хлебом неоскудно питал еси,// всем вся на пользу подавая.  

Обитель в честь Успения Пречистыя/ устроил еси, отче/ да приведутся Царю девы в след Царицы Матере/ сосуды избранныя и чистыя себе соделати// милости и истины Христовы.  

Слава: Грядущее яко настоящее/ зрел еси, святче Божий,/ слово рекл еси пророческое о судьбах храмов и обителей твоих/ еже и до дне сего сбывается// не остави нас молитвами твоими, отче. 

И ныне: Игумение Всечестная,/ Покрове обителем,/ управи житие монашеское в месте сем безпечально и свято,/ Помощница явися пасомым и начальником// да едиными усты Тя величаем.

Песнь 9.

Образ чистаго Рождества Твоего/ огнепалимая купина показа неопальная:/ и ныне на нас напастей угасити свирепеющую молимся пещь/ да Тя, Богородице// непрестанно величаем. 

Образ чудный Рождества Богородицы/ в благословение обители строителю ея даровася/ сей бысть чадо обетное, от неплодове родившееся/ от корене свята// отрасль святая и светлая. 

Успение твое удиви вся люди/ яко знамение неложное твоея святости:/ последнее воздав храму поклонение, на траву возлещи восхотел еси,/ камень в возглавие полагая,// яко образ веры твоея и подвига жестокаго.

Слава: Приидите, братие, во храм Богоявления/ и видите раку отца преподобнаго/ яко кивот святыни присножизненныя, чудесы сияющий/ и цельбы точащий// молитвами Лукиана игумена святаго.  

И ныне: В день честнаго Рождества Твоего/ сподобила еси кончины угодника Твоего, Владычице,/ и ныне молимся память смертную имети присно и на Суде оправдитися/ да Тя, Богородице,// непрестанно величаем.

Светилен, гл.1

Сияние святых Твоих, Господи,/ освещает пути живота нашего,/ отгоняет мглу грехов и неведения,/ и образ показует славы Твоея неизреченныя,/ еяже причастники да будем// ходатайствы Богоматере и Лукиана преподобнаго.

Слава и ныне: Праздника

 

Стихиры на Хвалитех, гл.6. Подобен: Тридневен: 

Благо ти есть, отче святый/ яко был еси игумен терпелив и милостив/ духоносен и добродетелен,/ не наемник, но пастырь истинен,/ благо же и пастве твоей/ таковаго отца дивнаго имети/ и пред Господем ходатая// за грехи наша Судию умолити могущаго.  

От Господа дар пастырства приемый,/ и овцы погибшия от муки вечныя восхищающий,/ благодать же сию великую/ завещал еси преемником твоим/ от нихже Корнилий сильный, тобою предреченный/ иже благонадежно и праведно продолжи дело твое/ заповедь Христову сотвори и многих научи// тем восхваляем вы, святии Лукиане и Корнилие.  

Сеявый слезами, радостию пожал еси небесною/ поты и бдении ветхаго человека победил еси/ терние страстей увядил еси/ житейских попечений и соблазнов бегая/ искушений тяготы не убоялся еси/ Христа Подвигоположника на помощь призывая// от Негоже венец спасения получил еси.  

Слава, глас тойже:
По блаженнем успении твоем, Лукиане святе/ не забыл еси чад твоих/ утешением велиим люди утешил еси/ предстательствовати пред Господем и Богоматерию я уверяя/ назидание спасительное, любовию твоею растворенное/ яко препитание духовное нам оставил еси/ и мощи твоя чудесне сохранишася от руки безбожныя// во спасение наше и укрепление.
И ныне: Праздника.